2010-12-31

2011 ألفين و حناش



من مرقتو باين عشاه
2011 ألفين و حناشSocialTwist Tell-a-Friend

2010-12-29

بين الجنرال و المحامي


لا تصوّتوا لمن صوّتكم بعد اليوم

بين الجنرال و المحاميSocialTwist Tell-a-Friend

2010-11-17

أضحى مبارك



تقبل الله منكم الطاعات
كل عام و أنتم بألف خير
أضحى مباركSocialTwist Tell-a-Friend

2010-09-04

2010-08-21

غرافيتي رمضانية



الثورة الرمضانية انطلقت يا رفاق
ههه .. يا تباركالله على ثوريي عقاب زمان
غرافيتي رمضانيةSocialTwist Tell-a-Friend

2010-08-12

السنة الدولية للشباب



بمناسبة السنة الدولية للشباب .. قولوا لا للحجب في جمهوريتنا

تم رسم هذه الصورة بطلب من أصدقائنا في
Nhar 3la 3ammar
(هذه الصفحة محجوبة في تونس)
الصورة مستوحات من الفكرة الأصلية للسيد
Nabil Farhat
(هذه الصفحة محجوبة في تونس)
السنة الدولية للشبابSocialTwist Tell-a-Friend

2010-08-10

2010-07-25

حجب جميع مدونات لحمر


ناس بكري كانو كيف يهل عليهم هلال العيد و العواشر يتركنو السلاح و يوقفو الحروب و العرك و المشاكل .. ما تسمع كان الصلاة عالنبي ولّي بينو بين واحد نكته كحلة يلم روحو و يمشيلو يطلب منو السماح

و اليوم .. 25 جويلية 2010 .. في هالنهار لفضيل (خاطي لعواشر) على التوانسه الكل اختارت الوكالة التونسية للأنترنات باش اتّكي على مدونة لحمر و تعيّد بيها .. الله أعلم شكون غلطهم فيه و نشّهم عليه قالهم راو يضحّي بالرغم إلي عمرو ما اندعى بانتماؤو لمعشر لعلالش و يا سعد إلي عاش علوش في هالبرّ

الجماعة لا عملو بأصول ولا حكّرو عواشر ولا قدّرو عيد .. هكّا لا طاح لا دزوه ظهرّلهم يذبحونا صباح عيد الجمهورية من غير ذنب و انحط سطرين على من غير ذنب .. على خاطر لا صاحب المدونة هاذي ولا الشخصية الكاريكاتورية الموجوده فيه خالفت نهار أي قانون كان

بالعكس حاولنا (لحمر و مولاه) أقصى جهدنا باش نسكّرو افّامنا و عينينا على معظم الهداري في الصّندي .. و اكتفينا بالتلميح للتّيفاف إلي قدرنا عليه و قد جرمنا .. و عمرنا ما حسبنا رواحنا أبطال ولاّ مصلحين عظام أصحاب مشاريع

هاذي التدوينة رقم 50 ما حبيتش انكرطشها قبل نهار العيد .. الله غالب كل مرّه نكون محضر فيها حويجة خاصّة يطلعلي عمّار من بلاصة وترصيلي نحكي عليه .. و اليوم هاو طلع السيد يلعبلي فوق بيرويا وانا ما فيباليش

هاي 50 تدوينة قدام الزّايرين .. افليوهم الكل بربي .. نتحدّى أي واحد يطلّعلي تدوينة وحدة خارجة على القانون ! صحيح المواضيع اموزوزه لكن عمرها ما خرجت على "حدود اللياقة" و مفهومهم "للمسموح به" .. حتى إنّي ما حبيتش نرسم حتى كاريكاتور لحتى وجه سياسي ولا غيرو .. بالرغم إلّي الكاريكاتور اتخلقت أصلا باش ترسم الوجوه و التركيز على العيوب و الخروج على النص

على هذاكه .. و في ظل هالمحظورات الكل .. اخترت باش الشخصية الرئيسية للمدونه تكون قلم موش عبد .. و الشخوص الدايرة بيها أقلام زاده تفاديا لأي شخصنة أو تشابه .. سبقلي باش مثلت العميل 404 في ستيلو أحمر و عمّار في طابع إداري

كيما مزالو عندي في القجر 3 شخصيات ما واتاتش باش نقدمهم و نخدم عليهم أكثر والّي هوما : صبع حمير سميتها حُمِّيره ، و ستيلو بيك سي الحمروني العطّار ، و الشيخ العلاّمة الأحمري ممثل في قلم متاع خطاط مصنوع من عود قصب

يعني المدونة هاذي راهي قصّة مصوّرة حلمت بيها برشه .. عامل عليها برشه كيف .. و عدّيت فيها معظم أوقات فراغي .. و قاعد نخدم عليها بالشويه بالشويه .. و بحكم مهنتي البعيده كليا على دومان الفنون و الرسم .. المدونة هاذي تعنيلي قطعا أكثر مما يعني رضاء السّاده على الوكالة التونسية للأنترنات

موش معناها إني عامل منها راس مال .. بالعكس بدليل أني مانصحّحش باسمي الحقيقي و زيد أسلوبي في الكتابه عامّي ولا عندي دمغجه ولا أطروحات و دروس .. نكتب و نصوّر و نعلّق في مواضيع تهمّني و تمسّني وتحيّرني
مرّة أخرى مانيش لاعبها بطل ولاّ عندي علم بأمور ما يعرفها غيري .. مدونتي هي فقط ركن عملتو باش نفرّغ فيه قلبي

حتى كيف نتعرض لقضايا وطنية ولاّ عالمية .. يا أخي أنا إنسان حي يرزق عايش وسط محيط متغيّر و الأحداث اللي نشوف فيها حولي هي إلي تعدات عليّا قبل ما نتعدّى عليها هي إلي أثرت فيّ قبل كل شي .. ياخي أنا مشيت لعمّار قصّيت عليه لنترنات ولاّ العكس ؟ مانجمشي نقعد ساكت على وضع موش عاجبني الله غالب

بعدين فمّا ماشالله ناس في تونس موافقين على القمع و يساندو فيه و يشجعو فيه يعني عمر عمار مازااال قدّامو و موش غدوة باش يتبدل الوضع .. ولاّ حسّني هو كي كتبت كلمتين نعبر فيهم على رايي في سياسة النعامة. إلي نحب نقولو هو إلي الشي إلي قاعده تعمل فيه الوكالة التونسية للأنترنات شي أكثر من مجاني و عبثي

قبل كي كنت نسمع بتسكير مدونة نتابع فيها كنت نحاول نتصل بالمدون نسألو على السبب و لما يجاوبوني يقولولي ما فما حتى سبب .. نكذب عينيّا و يبقى في قرارة نفسي احتمال خفي يقول لا لازم فمّا سبب و السيد ما في بالوش .. بالك كتب ونسى .. للّي هاو صار عليّا الشي
عندي ساعتين وانا انكمبص ونحاول نتذكر .. بالك جيت باش نقول حاجة و قبل مانقول كبتاها عمار و سجّلها و كي استينفت فات الفوت و الهدرة تقيّدت

والله كثر الهم يضحك .. حاليا مازلت في حالة صدمة .. على هذاكه طوال الهذيان و طوالت التدوينة .. مانيش عارف أناهو القرار الأسلم إلي باش نتخذو
نخمّم في اللّجوء للقضاء آما الفكرة هاذي تعني الإفصاح عن هويتي .. ونخمم زاده من جيهة أخرى مادامني محجوب وانا ما عندي ما قلت علاش مانزيدهاش لصْ و انشدلهم حارس مرمى وانحلّ عليهم فارعه كيما عاملين الكاريكاتوريين العالميين الكل في بلدان العالم الحر الكل .. لكن الفكرة هاذي تعني من غير شك السجن و من غير لجوءهم للقضاء

الحق حاليا مانيش قادر على اتخاذ قرار محدد .. آما الأكيد إلّي فمّا شي تبدّل فيّا اليوم نشالله ما لزّونيش للراديكالية .. و المؤكد أني باش نواصل التدوين .. لحمر باقي و ما يدوم في الواد كان حجرو يا ساده
حجب جميع مدونات لحمرSocialTwist Tell-a-Friend

2010-07-20

بدون تعليق



المرّه هاذي بدون تعليق
اسمع "بدون" موش معناها زكيم ولاّ سطل معنتها "من غير" .. و "التعليق" موش متاع الناس لخرى ألهمّ عافينا .. باختصار
No Comment ;)
بدون تعليقSocialTwist Tell-a-Friend

2010-07-19

نهار على عمار - مقتطفات

هاذي مجموعة من الصور (وغيرو) إلّي اخترتها من مساهمتي في تنشيط صفحة "نهار على عمار" على الفايسبوك خلال الاسابيع الاخيرة
نهار على عمار هي حركة مدنية سلمية مستقلة عن أي حزب سياسي .. تنشط في إطار الإحتجاج السلمي ضد الرقابة على الإنترنت في تونس

ملاحظة : صفحة نهار على عمار في الفايسبوك و الموقع الإلكتروني محجوبان. ممكن تنقر على أي صورة لتكبيرها

نهار على عمار - مقتطفاتSocialTwist Tell-a-Friend

2010-07-14

@ tn



Inter DI Net


الشركات التونسية المزودة لخدمات الأنترنات قاعدين يروّجو صباح و ليل في إشهارات كاذبة .. يوعدو في الناس بوعود واهية قال شنوة إبحار حر في العالم الإفتراضي الشاسع اللا متناهي و الغير مقيد

مجرد استخدامك لبركسي يثبتلك إلي نحنا في تونس ماناش قاعدين نبحرو في بحر النات إنما غاطسين للعنكوش في برميل عذاب (إذا موش طاسة حمام) محطوط تحت زيغو هابط مالسّطح ! جدران في كل بلاصة .. أسلاك شايكة مع كل رابط .. خطوط حمراء مع كل سطر نكتبوه .. غربال في كل كلمة نقراوها

الشي إلي قاعدين يبيعو فيه الشركات هاذوما ماسموش أنترنات إسمو أنتاردي النات ! يا إمّا يقولوها صراحة في الكنتراتوات .. يا إما لازم على مستخدمي الأنترنات في تونس يلقاو ثنية باش يشكيو بيهم و يعوضونا يا خويا ماديا و معنويا ..لخّره يطلبو السماح

بما أنو صعيب ياسر للمواطن العادي أنو يشكي بالحكومة (قالك تهديد أمن درا شنوه) لذا الحل الأنسب نشكيو بمزودي خدمات النات و الضغط عليهم .. خاترهم هوما القادرين على الضغط على الحكومة بشتى السبل .. موش عارف أنا ياخي إلي ندفعو فيه للناس هاذوما كروية ولا شنوة .. مزودي الخدمات في تونس قاعدين يا إمّا يتحيلو علينا ولاّ مطفين الضو على التحيل و مسيبين الجّلم متاع الصنصرة عامل شاطح باطح كيما يظهرلو

@ tnSocialTwist Tell-a-Friend

2010-07-07

رسالة حضرة المواطن لنوّاب المجلس


ـ تنجم تكبر الصورة لنّا ـ


المدّة لخّرة .. بعدت على المدوّنة شويّة خاطرني كنت لاهي بمساندة المجموعة الفايسبوكية متاع نهار على عمّار (محجوبة) إلّي نادات المدوّنين و التوانسة الّي يستعملو في الأنترنات باش يبعثو جوابات للنّواب و مطالبتهم بتقديم طلب لمسائلة الحكومة في خصوص عمّار .. و اخراجو للعموم و التعريف بيه

فماشي ما يتنحى الغربال على عين الشّمس و تتنحى الماسكه و استبلاه الناس .. قال شنوّة مافماش منها حكاية عمار و لا فمّا فرقة تابعة للمخابرات الداخلية ساهرة صباح وليل على مرجان المبحرين في الشبكة العنكبوتية

لحقيقة .. ماللوّل لكلكت و مهمهت (لأسباب تو نرجعلها في مدوّنة خاصّة بعد ما توفا هالحملة) آما كي تابعت نشاط مجموعة نهار على عمّار في فايسبوك و على غوغل غروب زاده .. لقيت جماعة من خيرة أولاد بلادي عازمين عاقدين النيّة بالرّغم مالإرهاب و القمع إلّي عاناو منّو .. لقيتهم منوّرين مبتكرين بالرّغم مالقتامة و التشاؤم و الإحباط المحيط بيهم

ما نعرش آش صار .. كنت نحضر في كاريكاتور و تدوينة نحكي فيها على نوّاب المجلس (موش مجلس النوّاب) نفش فيها غلّي علّي صار جرّة قانون الأمن الإقتصادي الجديد .. مظهر آخر من مظاهر لعوج في البلاد
و في نفس الوقت كان مخّي مع تعليقات اتطلّع في الماء للصعدة قريتهم على حيط المجموعة .. و لاعلينا في أصحابها

الجو العام كان لحقيقة ياسر محبط للعزايم .. مبرّد للقوايم (ربي يعاونهم الجماعة) .. باين بالكاشف أمر محزن هو أنّو معظم الناس إلّي علّقو لا حكّرو أي قيمة لمؤسّسة البرلمان في جمهوريتنا المسكينة .. و لا تحس فمّا أدنى ثيقة في النواب إلي من المفروض يمثلو الشعب .. و لا هم يحزنون

أنا بيدي تسائلت بيني و بين روحي على الجدوى من مراسلة نوّاب المجلس لقيت روحي محتار أيّ نار أختار !
هزّيت .. حطّيت .. قلت نختار النّار الأبرد و السّلبيّة ثنيّة قصيرة توفا ديما بقتلان لقلوب .. ريت إلّي المثل العليا إلّي ادّافع عنها المجموعة تعنيلي الكثير و كانت القضية إلي مرضت التوانسة الكل في حاجة للدّعم .. عاونت بالجهد إلّي قدرت عليه و كلّي أمل إلّي لومور تتحرّك حتّى صانتي .. يزّي فيه البركة

يا ولدي كخطوة أولى .. مجرّد إعتراف الحكومة بوجود عمّار و ممارساتو المتخلّفة و الغير قانونية و المسكوت عليها .. عندي أنا بركات تستحق زردة ! و برجولية حرام ما نساندوش حركة فيها نبل كثير .. و تحضر أكثر .. و شجاعة أكثرين .. و تضحيات أكثر واكثرين

يا ليت إلي يقرى التدوينة هاذي و مزال ما بعثشي جواب يبعث .. برشة بعثو و برشة مزالو بش يبعثو .. و بالرغم إلي فمّا برشة ناس من مجموعة نهار على عمار تهنتلو .. واتوقفو .. و اترعبو .. مازالت تونس ولاّده .. و الكف إلي ما يقتلكشي اتقوّى بيه و ما تنساهش

وانا واحد منّاس عمري ما نسيت
رسالة حضرة المواطن لنوّاب المجلسSocialTwist Tell-a-Friend

2010-06-27

WC الإفريقية



جميع الفرق الافريقية تقصى منذ الدور الاول لنهائيات كأس العالم .. ماعدى غانا
WC الإفريقيةSocialTwist Tell-a-Friend

2010-06-24

تونس مدى الحياة و الممات



صاحب الجلالة و أصحاب المعالي و الفخامة و السموّ
(في وفاة السيد محمد مزالي)
تونس مدى الحياة و المماتSocialTwist Tell-a-Friend

2010-06-20

نسر قرطاج لمذرّح و الحقّاني



بربّي عندي كليمة على المنتخب الوطني التونسي ليّا مدّة نحب ننشرها .. و الحديث ماهوش على تشكيلة ولاّ تكتيك .. لا شوط ثالث .. لا أحد رياضي .. ولا ستوديو المونديال ! نحب نحكي على شعار المنتخب و على التصاور متاع النسوره لملصقة على علم تونس إلي قاعدة تسركيلي على الأنترنات عندها مدّة طويلة

من غير ما نطوّلوها الهدرة و هي قصيرة .. ما فمّاش في تونس و في منطقة المغرب العربي نسر راسو أبيض إطلاقا! إلّي عنّا أنواع مختلفة من النّسوره
و كي قدّر ربّي علينا باش نعملو نسر كـ"ماسكوت" لمنتخبنا كان على جامعة الكوره و المسؤولين على الرياضة في البلاد يعملو بحث صغيرون في المسألة ـ اضغط لنّا ـ و يكلفو ناس تعرف موش يشاورو الحلاّق و زملاؤه .. قبل ما يحطو صورة طائر غريب علينا و ما عندو حتى علاقة بأرضنا و تاريخنا و شعبنا و حتى طقسنا

كان هكّا علاش ما تنحيش فرانسا السردوك و تعوّضو بدجاجة مصرية ولاّ كيوي أسترالي .. و الكنغورو في عوض الدبّ الروسي .. و النمر السيبيري في بلاصة أسود التيرنغا .. و الثعلب القطبي في بلاصة الفنك الدزيري !؟

مالا شنوّه ؟ توّا مدّه التالي طلعت فيديو في الفايسبوك فيها مذيع تلفزي زعمة زعمة يختبر في رجل الشارع لمريكي بأسئلة ثقافة عامّة في الجغرافيا .. التوانسة الكل شاخو عليها .. قال شنوة شوف لامريكان مابهمهم ! إيه و توّا آش قولكم في تسطيكة المسؤولين متاعنا .. و آشنيّه حوالك مع واحد أمريكي يشوفك حاطط تصويرة النسر رمز بلادو على صفحتك في الفايسبوك مثلا ؟



النسر الأمريكي (إلّي راسو أبيض) إسمو أمريكي خاطرو ما يعيش كان في أمريكا (راجع ويكيبيديا ـ اضغط لنّا ـ الموسوعة الحرّة) على هذاكا اختاروه لاماريكان كرمز لقوّتهم السياسية و لقوّاتهم العسكرية
لمّا تحط نسر أمريكي على علم تونس معناها كايني أمريكا غزات تونس
نسر قرطاج لمذرّح و الحقّانيSocialTwist Tell-a-Friend

2010-06-19

درس تكميلي في القراءة



في إطار إعادة الوعي للمواطنين التونسيين المغشي عليهم
درس تكميلي في القراءةSocialTwist Tell-a-Friend

2010-06-04

لمسة تونسية على سكايبي



شكون قاعد يبعول في سكايبي ؟

المدة لخّرة .. برشة من مستخدمي الإنترنت التونسيين ما حبسوش التذمر من مشاكل 'مشبوهة' طارئة على برمجيات وخدمات الدردشة عن طريق الفيديو و الصوت .. كيما سكايبي و ام اس ان

الناس الكل فازعة و حد ماهو فاهم شي .. وطرف التفسيرات إلّي قريتها على البلوغوسفار تشير بأصابع الإتهام (السبابة و غيرو) لسي عمار! آش قالك آش قام عليك .. قالك ما يطلع كان هو

علاش انشالله خير ؟ قالك زايد .. ظاهر فيه بني الكلب قاعد يحضر في مفاجأة جديدة لجميع التونسيين إلي عندهم أقارب و أحباب يعيشو وراء البحار .. زعمة ولّينا إلكلنا بارانوياك لها الدّرجة ؟ يا ذنوبي .. آما الشي الوحيد المؤكد .. إلي لحكاية هاذي من أوّلها باينة ممسوسة مطبوعة مختومة بلمسة تونسية! ميا فالميا
لمسة تونسية على سكايبيSocialTwist Tell-a-Friend

2010-06-01

البساط الأحمر ! الإسرائيلي



إسرائيل تفرش دائما البساط الأحمر لاستقبال الزوار الخارقين للعادة
!
البساط الأحمر ! الإسرائيليSocialTwist Tell-a-Friend

2010-05-26

ISO 404



جميع المدوّنات التونسية مدعوّة للتسجيل التطوّعي تحت لواء هذا البرنامج الطّموح
ISO 404SocialTwist Tell-a-Friend

2010-05-21

زعمه يفتح عمار الستار ؟



صالح عندو مايقول لعمار نهار 22 ماي
-سيب صالح-
مجموعة فايسبوكية ضد الحجب و سياسة عمار 404 المتخلفة

-نهار على عمار-
حركة احتجاج سلمي على الفايسبوك تنظم غدوة اعتصام قدام وزارة الاتصال مع ماضي تلاثة
زعمه يفتح عمار الستار ؟SocialTwist Tell-a-Friend

2010-05-16

FerryVille / FarmVille



S.O.S "GUENGLA": Tous Unis Contre le ravage des arbres
أو "قنقلة تستغيث" : معًا ضدّ تخريب الأشجار
سامحوني على التّرجمة إذا ظهرتلكم ضعيفة راني مانيش مترجم مختص .. آما أكيد إلّي سمعتو بيها هالمجموعة الفايسبوكية هاذي إلي عندها مووودّة طوييييلة و هيّا "تنبح تنبح" للّي ريقها انشف

كيما عوّدت زوّار المدوّنة .. مانيش باش انطوّل في الهدرة برشه
المجموعة هاذي خيّرت تهدّي اللّعب شويّا بعد ما حاولت السّلط الجهويّة تلصّق عليها تيكيّات خشبية بجميع أصنافها .. كيما حاولت (ما اصطلح على تسميته بـ) "المعارضة" الرّكوب على موجتها وقت (ما اصطلح على تسميته بـ) الإنتخابات البلدية

و اليوم بعد ما وفات هاك الهرجة و المرجة متاع الإنتخابات رجعت المجموعة إلنشاطها المدني السلمي الغير مسيّس .. هي مجموعة طيبة عاملة مجهود أطيب تستحق كلّ الدعم و المساندة .. و على خاطر مثل هالمبادرات لحلوّة قرّر خوكم لحمر الإلتحاق بالفايسبوك بعد ممانعة و تردّد دام سنين

عاد إلّي ينجّم يعاون بالفعل موش بمدّان لوجوه .. مذا بيه ينظمّ للمجموعة هاذي و يمد يديه للبركة نتعاونو على فهم كيفاش في تونس الخضراء اليوم سوم شجرة عمرها أكثر من ميات سنة وصل بحق كيلو و نص لحم !؟
FerryVille / FarmVilleSocialTwist Tell-a-Friend

2010-05-12

أخيرا لحمر في الفايسبوك


الله غالب .. توّا ولّينا إلّي ما عندوش فايسبوك محسوب موش موجود على الخريطة جمله
أخيرا لحمر في الفايسبوكSocialTwist Tell-a-Friend

2010-05-11

La7mer BlogSpot



صورة لحمر الرسمية على البلوغسبوط
La7mer BlogSpotSocialTwist Tell-a-Friend

2010-05-06

عيد السّخافة التونسيّة


احتفلت البلاد كسائر دول المعمورة يوم 3 ماي بعيد الصحافة العالمي
فهنيئا لصاحبة الجلالة .. السلطة الأربع مائة و أربعة
و هنيئا لتونس
حاكمين و محكومين .. قاعدة و واقفة .. مخيَّرين و محقّرين
و الله لا يضيع جزاء الكاتمين لكلمة الحق يوم الدين
عيد السّخافة التونسيّةSocialTwist Tell-a-Friend

2010-05-03

404 BlackOut - نكتة عقاب شهر



ما دامو لبهيم لقصيّر إلّي يجي يفش غلّو فيه .. ما دمنا عاملينو تكركيرة صباح وليل انفرّكو فيها عليه
ما دامو محقور .. ما دام ضمارو جد عليه و مشى في بالو والفنا بهبالو
ما دام حتى حدّ ما عاد يعدّل عليه .. ما دمنا ضاحكينلو .. لازمو .. بالسيف عليه يتمدّ على طولو
و يرمي لربعة
و يزيد يتحل كي الطفل

المطلوب و المؤكد هو ضرورة نزع المساحيق عن هذا الوجه المقنّع
و في رأيي عمّار لا هو من الإنس و لا من الجان
عمّار هو منهج من سياسة عامّة لاكها الزّمان و لاك حتى كادت تبصقه هي لا العكس ..سياسة نظّرت و شرّعت لها ثم وضعتها و فرضتها تلك العقليّة المقيتة لكلّ مسؤول بال تقادمت به المسؤولية حتى تناسى أنّه مسؤول أمام ضميره و أهله و أمّته .. و تاريخ و حاضر و مستقبل البلاد

تلك العقلية المستحلبة من ثدي العصور الغابرة البور .. عقليّة الراعي و الرّعيّة و فتاوى قصور العامّة و ضرورة مبايعة أولياء عليها على طريقة المرشد الأعلى المنزّه .. و المولّى عمّار السّاهر الذي يرى كلّ شيء ولا يراه أحد

إلى من يهمه الأمر .. أحجب ما كرهت من مواقع و مدونات عن أهلك و نفسك .. فأنت حر فيما تملك .. و دعني و شأني أكره و أحب ما أشاء .. فأنا حرّ لا أعبد غير الأحد
أو دلّوني أين قبرت روح جمهوريتنا حتى أعلن الحداد و أنكّس أعلام ما أنا مزهوّ بكسبه
كبّدوني هزيمتي و سأرحل
404 BlackOut - نكتة عقاب شهرSocialTwist Tell-a-Friend