رسالة حضرة المواطن لنوّاب المجلس

ـ تنجم تكبر الصورة لنّا ـ

المدّة لخّرة .. بعدت على المدوّنة شويّة خاطرني كنت لاهي بمساندة المجموعة الفايسبوكية متاع نهار على عمّار (محجوبة) إلّي نادات المدوّنين و التوانسة الّي يستعملو في الأنترنات باش يبعثو جوابات للنّواب و مطالبتهم بتقديم طلب لمسائلة الحكومة في خصوص عمّار .. و اخراجو للعموم و التعريف بيه

فماشي ما يتنحى الغربال على عين الشّمس و تتنحى الماسكه و استبلاه الناس .. قال شنوّة مافماش منها حكاية عمار و لا فمّا فرقة تابعة للمخابرات الداخلية ساهرة صباح وليل على مرجان المبحرين في الشبكة العنكبوتية

لحقيقة .. ماللوّل لكلكت و مهمهت (لأسباب تو نرجعلها في مدوّنة خاصّة بعد ما توفا هالحملة) آما كي تابعت نشاط مجموعة نهار على عمّار في فايسبوك و على غوغل غروب زاده .. لقيت جماعة من خيرة أولاد بلادي عازمين عاقدين النيّة بالرّغم مالإرهاب و القمع إلّي عاناو منّو .. لقيتهم منوّرين مبتكرين بالرّغم مالقتامة و التشاؤم و الإحباط المحيط بيهم

ما نعرش آش صار .. كنت نحضر في كاريكاتور و تدوينة نحكي فيها على نوّاب المجلس (موش مجلس النوّاب) نفش فيها غلّي علّي صار جرّة قانون الأمن الإقتصادي الجديد .. مظهر آخر من مظاهر لعوج في البلاد
و في نفس الوقت كان مخّي مع تعليقات اتطلّع في الماء للصعدة قريتهم على حيط المجموعة .. و لاعلينا في أصحابها

الجو العام كان لحقيقة ياسر محبط للعزايم .. مبرّد للقوايم (ربي يعاونهم الجماعة) .. باين بالكاشف أمر محزن هو أنّو معظم الناس إلّي علّقو لا حكّرو أي قيمة لمؤسّسة البرلمان في جمهوريتنا المسكينة .. و لا تحس فمّا أدنى ثيقة في النواب إلي من المفروض يمثلو الشعب .. و لا هم يحزنون

أنا بيدي تسائلت بيني و بين روحي على الجدوى من مراسلة نوّاب المجلس لقيت روحي محتار أيّ نار أختار !
هزّيت .. حطّيت .. قلت نختار النّار الأبرد و السّلبيّة ثنيّة قصيرة توفا ديما بقتلان لقلوب .. ريت إلّي المثل العليا إلّي ادّافع عنها المجموعة تعنيلي الكثير و كانت القضية إلي مرضت التوانسة الكل في حاجة للدّعم .. عاونت بالجهد إلّي قدرت عليه و كلّي أمل إلّي لومور تتحرّك حتّى صانتي .. يزّي فيه البركة

يا ولدي كخطوة أولى .. مجرّد إعتراف الحكومة بوجود عمّار و ممارساتو المتخلّفة و الغير قانونية و المسكوت عليها .. عندي أنا بركات تستحق زردة ! و برجولية حرام ما نساندوش حركة فيها نبل كثير .. و تحضر أكثر .. و شجاعة أكثرين .. و تضحيات أكثر واكثرين

يا ليت إلي يقرى التدوينة هاذي و مزال ما بعثشي جواب يبعث .. برشة بعثو و برشة مزالو بش يبعثو .. و بالرغم إلي فمّا برشة ناس من مجموعة نهار على عمار تهنتلو .. واتوقفو .. و اترعبو .. مازالت تونس ولاّده .. و الكف إلي ما يقتلكشي اتقوّى بيه و ما تنساهش

وانا واحد منّاس عمري ما نسيت