لأسباب كثيرة غبت مديدة على حومة المدونات التونسية .. و لمّا رجعت نهيّرين إلتالي كان ماشي في بالي باش ننشر حويجة حلوّة ولاّ بطاقة ضامرة بمناسبة عيد الحب .. لكن الله يجازي بإلّي يستاهلو سي عمّار بو الـ 404 إلّي مرّض جميع المدوّنين التونسيّين
ما صدّقت خبر حجب مدوّنة أفكار ليلية متاع طارق الكحلاوي إلاّ ما زرت الصفحة و ريت بعيني الشي إلّي يحشّم و يمقت كلّ ورقة تونسيّة و كلّ قلم تونسي حرّ
اليوم في 2010 .. مازلنا نعيشو كتوانسه عصر لمْهارس (جمع مهراس) عهد مازال فيه أصحاب النفوذ و القرار يتحكّمو في خلق الله بالزّلاّط .. عصر تجازي فيه السلطة التونسيّة بِسْبَلّطْ أولادها إلّي يحسّو في رواحهم عندهم إضافة و يحاولو يقولو و يعبّرو و يثريو المشهد البلوغوسفيري التونسي بشي مغاير لـ "محلاك .. مابنّك" LOL & MDR والرّيق البارد و السّخون
مازال خيار القوم في تونس يمّنو بظرورة تَوْلية وليّ حصري قصري على التوانسة الكل بكبيرهم بصغيرهم بما دبا على حصيرهم .. وليّ و مرشد أعلى يتحكّم في إلّي يشوفو و يقراه عشرة ملايين آدمي
حاطّين عسّاس مشكوك في درجة ثقافتو و حرفيتو شادد في يمينو دبّوس التّخلف و حاطط يسارو الملعونة على "الرّوبيني داريه" متاع لنترنات في دولة كاملة بحشيشها و ريشها .. يعني غورلاّ خارجة من أدغال جبال خمير هي إلّي تقرّر شكون يتعدّى و شكون "أريـالْ" و شنوّة السّنة مالفرض
طارق إنسان لطيف و محترم .. متثقف و متعلم .. عندو ما يقول في روحو و للنّاس .. علاش تحرمو من حقّو الطبيعي (الحيواني حتى) في إصدار صوتو .. كإنسان حقو في التعبير عن همو و رايو شي مقدّس و منصوص عليه في دساتير الدنيا و حقو مصادقة عليه تونس في اللائحة الأممية لحقوق الإنسان
و كمواطن تونسي عندو الحق علينا الكل كتوانسة للإصغاء و الإستماع لما عندو .. بعدين توافقو .. تختلف معاه هاذي أمورك مع شعورك و ماهيش بتاتا و قطعا مهمّة سي عمّار المهراس
بكل أمانة حاولت نفركس عن الأسباب للحجب بيني وبين روحي .. برجولية مالقيتش سبب واحد ! بالك طب لخلى و عرّى روحو وانا ما في باليش؟ تي أول ما تعرّفت على مدونتو (توة مدة طويلة) مشى في بالي إنّو تجمّعي مقيم بالخارج .. عمري ما قريتلو تدوينة متطرفة في النقد .. بالعكس .. تدخلاتو كانت ديما في حدود اللياقة
السبب الوحيد إلي لقيتو لتفسير هالقرار الإعتباطي هو أنو سي عمار قرر باش يحجب كل المدونين التونسيين البارزين و المؤثرين و المؤثثين للبلوغوسفار التونسية .. و طارق من غير شك واحد منهم و من أكثر المدونين التونسيين نشاطا
يعني بالرغم إلي نختلف في الراي مع طارق في برشة مواضيع إلا أنو المخلوق هذاكة نحب نقرالو .. تلاحظ في تدويناتو الكل جهد و جدية و محاولة دايمة لابراز الراي المخالف نوع من بحث عن موضوعية في الطرح
فما حاجة ما يعرفهاش طارق هي أني العبدو لله جيت للبلوغوسبوط تقريبا بفضلو .. أنا كنت اندوّن على ياهو 360 مع مجموعة مالأصحاب من 2006 تقريب و لما تسكّر الـ 360 تشتتنا و نهار صديقة أمريكية تعيش في تونس كنا ديما نتجادلو بيناتنا (فيما يخص المواضيع السياسية و هموم تونس) بعثتلي الرابط المدونتو و نصحتني بيها
ليّة شهور إذا موش سنين نتابع في تدويناتو و من خلال التعليقات على صفحتو تعرفت على برشة مدونات تحفونة و على تونبلوغ و من خلال تدويناتو نفحت على النشاط التدويني .. و أنا كمواطن تونسي نطالب بحقي في متابعة المدوّنات إلي تعجبني و إلي تحرك فيا السواكن و إلي نتفاعل معاها سلبا أو إيجابا
يا رسول الله آش رحلو فيّا عمار فاش نقرا و ما نقراش .. تي ماو كيف موش عاجبك كلام طارق و غيرو إحجبهم على أهلك و فك على قتلي أنا .. و إلي يشتهى شهوة يديرها فعشاه
