دعاء رمضان 2010

قولوا آمين

حجب جميع مدونات لحمر

ناس بكري كانو كيف يهل عليهم هلال العيد و العواشر يتركنو السلاح و يوقفو الحروب و العرك و المشاكل .. ما تسمع كان الصلاة عالنبي ولّي بينو بين واحد نكته كحلة يلم روحو و يمشيلو يطلب منو السماح

و اليوم .. 25 جويلية 2010 .. في هالنهار لفضيل (خاطي لعواشر) على التوانسه الكل اختارت الوكالة التونسية للأنترنات باش اتّكي على مدونة لحمر و تعيّد بيها .. الله أعلم شكون غلطهم فيه و نشّهم عليه قالهم راو يضحّي بالرغم إلي عمرو ما اندعى بانتماؤو لمعشر لعلالش و يا سعد إلي عاش علوش في هالبرّ

الجماعة لا عملو بأصول ولا حكّرو عواشر ولا قدّرو عيد .. هكّا لا طاح لا دزوه ظهرّلهم يذبحونا صباح عيد الجمهورية من غير ذنب و انحط سطرين على من غير ذنب .. على خاطر لا صاحب المدونة هاذي ولا الشخصية الكاريكاتورية الموجوده فيه خالفت نهار أي قانون كان

بالعكس حاولنا (لحمر و مولاه) أقصى جهدنا باش نسكّرو افّامنا و عينينا على معظم الهداري في الصّندي .. و اكتفينا بالتلميح للتّيفاف إلي قدرنا عليه و قد جرمنا .. و عمرنا ما حسبنا رواحنا أبطال ولاّ مصلحين عظام أصحاب مشاريع

هاذي التدوينة رقم 50 ما حبيتش انكرطشها قبل نهار العيد .. الله غالب كل مرّه نكون محضر فيها حويجة خاصّة يطلعلي عمّار من بلاصة وترصيلي نحكي عليه .. و اليوم هاو طلع السيد يلعبلي فوق بيرويا وانا ما فيباليش

هاي 50 تدوينة قدام الزّايرين .. افليوهم الكل بربي .. نتحدّى أي واحد يطلّعلي تدوينة وحدة خارجة على القانون ! صحيح المواضيع اموزوزه لكن عمرها ما خرجت على "حدود اللياقة" و مفهومهم "للمسموح به" .. حتى إنّي ما حبيتش نرسم حتى كاريكاتور لحتى وجه سياسي ولا غيرو .. بالرغم إلّي الكاريكاتور اتخلقت أصلا باش ترسم الوجوه و التركيز على العيوب و الخروج على النص

على هذاكه .. و في ظل هالمحظورات الكل .. اخترت باش الشخصية الرئيسية للمدونه تكون قلم موش عبد .. و الشخوص الدايرة بيها أقلام زاده تفاديا لأي شخصنة أو تشابه .. سبقلي باش مثلت العميل 404 في ستيلو أحمر و عمّار في طابع إداري

كيما مزالو عندي في القجر 3 شخصيات ما واتاتش باش نقدمهم و نخدم عليهم أكثر والّي هوما : صبع حمير سميتها حُمِّيره ، و ستيلو بيك سي الحمروني العطّار ، و الشيخ العلاّمة الأحمري ممثل في قلم متاع خطاط مصنوع من عود قصب

يعني المدونة هاذي راهي قصّة مصوّرة حلمت بيها برشه .. عامل عليها برشه كيف .. و عدّيت فيها معظم أوقات فراغي .. و قاعد نخدم عليها بالشويه بالشويه .. و بحكم مهنتي البعيده كليا على دومان الفنون و الرسم .. المدونة هاذي تعنيلي قطعا أكثر مما يعني رضاء السّاده على الوكالة التونسية للأنترنات

موش معناها إني عامل منها راس مال .. بالعكس بدليل أني مانصحّحش باسمي الحقيقي و زيد أسلوبي في الكتابه عامّي ولا عندي دمغجه ولا أطروحات و دروس .. نكتب و نصوّر و نعلّق في مواضيع تهمّني و تمسّني وتحيّرني
مرّة أخرى مانيش لاعبها بطل ولاّ عندي علم بأمور ما يعرفها غيري .. مدونتي هي فقط ركن عملتو باش نفرّغ فيه قلبي

حتى كيف نتعرض لقضايا وطنية ولاّ عالمية .. يا أخي أنا إنسان حي يرزق عايش وسط محيط متغيّر و الأحداث اللي نشوف فيها حولي هي إلي تعدات عليّا قبل ما نتعدّى عليها هي إلي أثرت فيّ قبل كل شي .. ياخي أنا مشيت لعمّار قصّيت عليه لنترنات ولاّ العكس ؟ مانجمشي نقعد ساكت على وضع موش عاجبني الله غالب

بعدين فمّا ماشالله ناس في تونس موافقين على القمع و يساندو فيه و يشجعو فيه يعني عمر عمار مازااال قدّامو و موش غدوة باش يتبدل الوضع .. ولاّ حسّني هو كي كتبت كلمتين نعبر فيهم على رايي في سياسة النعامة. إلي نحب نقولو هو إلي الشي إلي قاعده تعمل فيه الوكالة التونسية للأنترنات شي أكثر من مجاني و عبثي

قبل كي كنت نسمع بتسكير مدونة نتابع فيها كنت نحاول نتصل بالمدون نسألو على السبب و لما يجاوبوني يقولولي ما فما حتى سبب .. نكذب عينيّا و يبقى في قرارة نفسي احتمال خفي يقول لا لازم فمّا سبب و السيد ما في بالوش .. بالك كتب ونسى .. للّي هاو صار عليّا الشي
عندي ساعتين وانا انكمبص ونحاول نتذكر .. بالك جيت باش نقول حاجة و قبل مانقول كبتاها عمار و سجّلها و كي استينفت فات الفوت و الهدرة تقيّدت

والله كثر الهم يضحك .. حاليا مازلت في حالة صدمة .. على هذاكه طوال الهذيان و طوالت التدوينة .. مانيش عارف أناهو القرار الأسلم إلي باش نتخذو
نخمّم في اللّجوء للقضاء آما الفكرة هاذي تعني الإفصاح عن هويتي .. ونخمم زاده من جيهة أخرى مادامني محجوب وانا ما عندي ما قلت علاش مانزيدهاش لصْ و انشدلهم حارس مرمى وانحلّ عليهم فارعه كيما عاملين الكاريكاتوريين العالميين الكل في بلدان العالم الحر الكل .. لكن الفكرة هاذي تعني من غير شك السجن و من غير لجوءهم للقضاء

الحق حاليا مانيش قادر على اتخاذ قرار محدد .. آما الأكيد إلّي فمّا شي تبدّل فيّا اليوم نشالله ما لزّونيش للراديكالية .. و المؤكد أني باش نواصل التدوين .. لحمر باقي و ما يدوم في الواد كان حجرو يا ساده

أخيرا لحمر في الفايسبوك

الله غالب .. توّا ولّينا إلّي ما عندوش فايسبوك محسوب موش موجود على الخريطة جمله

لحمر Lahmer

Créez votre badge

La7mer BlogSpot

صورة لحمر الرسمية على البلوغسبوط

3-8 في اليوم العالمي للمرأة

٨ مارس ـ يوم المرأة

نحطّو خْطار يطلع راجل إلّي اختار التاريخ هذا؟

لحمر، الرسوم الأوليّة الأولى

حصريّا
هذه نظرة مقتضبة عن الرّسومات الأوّليّة الأولى عن للشّخصيّات الكاريكاتورية التي ستؤثّث مغامرات صديقنا لحمر
La7mer

كيما تنجمو تلاحظو الأشغال جارية و حثيثة .. و ساعات موش على قدم و ساق بل على وحدة ونصّ نظرا لأنّو الفورما يخزيها تحظر واتغيب

نتمنّى بكل صدق إني نلقى الوقت .. و الوقت الطيّب .. و راحت البال و برشة ضمار و شويّة همّ .. باش نتوصّل انكمّل الرّسومات الأوّليّة الأساسيّة لثلاثة على الأقل من الشخصيّات إلّي في بالي قبل موفّى شهر جانفي .. وعلاش لا نتمكن من إخراج أوّل رسم متكامل رسميّا في الأسبوع الأوّل للسّنة الجديدة

لحقيقة نعترف و أقرّ أنّو سي لحمر و صحابو طال بيهم المخاض .. كيما نعترف أنّ الرّسومات إلّي سبقلي ونشرتهم على هذه المدوّنة ماهمشي من أرقى الرّسومات الكاريكاتورية ولا هوما من أحسن ما يمكنني تقديمه و لا ليهم علاقة بالرسومات إلّي نخمّم فيهم و الشخصيّات إلي إختلقتهم في خيالي

كنت ومازلت لحد الساعة هاذي خايف .. موش من المواضيع إلي نحب نحكي فيها و إنّما خايف لا يتمخض الجبل ليلد فأرا .. خايف لنحمّل لحمر أكثر ممّ يتحمّل .. خايف لنردّو يشبّهلي .. خايف لنولّي نشبّهلو .. خايف عليه و منّو

خايف من توقّعاتي من أمانيّ من أحلامي منّو .. خايف لا نوصل بيه لطريق مزدود بعد ما نصرف عليه من وقتي و جهدي الكثير الكثير كيما صارلي سابقا مع مدوّناتي السّابقة إلّي أعدمتها تلقائيّا .. ليبعث لحمر .. من جديد

على كل حال

أيّها المواطنون و المواطنات .. الإفتراضيون و الإفتراضيّات .. أرجو من كل قلبي لكلّ من هو في الإصغاء و كل من هو متابع لهذه المدوّنة أنّه سيكون أحد الشاهدين المحظوظين على ميلاد محاولة ثرية مفيدة و ممتعة على طول السّنة الوليدة القادمة

ألقاكم بخير في السنة القادمة إنشالله