لو كنت الشابي لتمنيت أن أكون هايشة بكمة

موقع اليوتوب المعبي برشة بالتفاهة و الريق البارد .. معبي زاده ياسر بالنوادر و الجواهر
هذي وحدة من أروع المقاطع الموجودة على الموقع .. بالجد حاجة روعة + موش نورمال + من ورا لعقل .. سميه كيما تحب آما كي تتفرج فيه ما نتصورش تنساه .. مخك ياقف و حبتلك بش تعاود ترجع إلحالتك العادية

بإختصار مقطع نادر جدا صورو صدفة توريست هاوي في محمية طبيعية إفريقية حسدوه عليه أكبر المصورين المحترفين .. المقطع حقيقي يعني ماهوش مذرح ولا مركب .. أول ما سمعت بيه كان على القناة التفزية الأمريكيةالمختصة في البرامج الوثائقية

National Geographic

جابو مختصين و دكاترة و باحثين عملولهم طاولة و كراسي و طاحو يشرحوا في الشي إلي شافوه على المقطع لقصير تقريب ساعة و نص بالطبيعة تحليلهم كان علمي و مفصل للشقيقة و الرقيقة .. وانا نخزر كاشخ و تحليلي للحكاية كان غير تحليلهم

لحقيقة شي يبهت و بصراحة بخست روحي كبشر و طحت انراجع في دروسي و مبادئي .. زعمة آشكون أرجل الهوش ولا بنادم .. أشكون أسمى و أحق في تسخير الآخر إلخدمتو .. شكون و شكون .. و كيفاش يا رسوله و ها ربي حنّي ؟

هاو علاش أبو القاسم الشابي مات صغير .. هاو علاش نبح نبح عيط عيط في اللّخر هز رويحتو و طلع للجبل يحكي مع البك و الشجر و الحيوانات

المقطع موجود في اليوتوب شافوه ملايين و اسمو

Battle at kruger

برجولية أنا وليت إنشك إلي صار تحريف في قصايدو بعد ماريت المقطع
هذا .. موش الشعب آما لهوايش .. إذا أرادت يوما الحياة